ခွင့်ပြုထားသည့် လိုင်စင်များနှင့်ပတ်သက်၍ လုပ်ငန်းရှင်အမည်ပြောင်း၊
လုပ်ငန်းအမည်ပြောင်း၊ လုပ်ငန်းအချက်အလက်ပြောင်းခြင်းများအတွက်
အချက်အလက်ပြောင်း(လိုင်စင်အမျိုးအစားအားလုံး) လျှောက်ထားခြင်းနှင့်ခွင့်ပြုခြင်း
လိုင်စင်လျှောက်ထားခြင်းနှင့်စိစစ်ဆောင်ရွက်ခြင်း
၁။ ခွင့်ပြုထားသည့် လိုင်စင်များနှင့်ပတ်သက်၍ လုပ်ငန်းရှင်အမည်ပြောင်း၊ လုပ်ငန်းအမည်ပြောင်း၊ လုပ်ငန်းလိပ်စာပြောင်း၊ လုပ်ငန်းအချက်အလက်ပြောင်းခြင်းများအတွက် ဆောင်ရွက်လိုပါက Error! Hyperlink reference not valid. Website ရှိ Online လျှောက်လွှာတွင် ဖြည့်စွက်ပြီး အောက်ပါအထောက်အထားများ ပူးတွဲ၍ သက်ဆိုင်ရာမြို့နယ်စည်ပင် သာယာရေးကော်မတီသို့ လျှောက်ထားရမည်-
(က) နိုင်ငံသားစိစစ်ရေးကတ်မိတ္တူ၊
( ခ) လိုင်စင်ကတ်ပြားမူရင်းနှင့်မိတ္တူ၊
( ဂ) ပြောင်းလဲခြင်းအတွက် အထောက်အထား၊
(ဃ) လုပ်ငန်းရှင်အမည်ပြောင်းပါက ပြောင်းလဲမည့် ပုဂ္ဂိုလ်(၂)ဦးသည် မြို့နယ်စည်ပင်သာယာ အုပ်ချုပ်ရေးမှူး ရှေ့မှောက်၌ လက်မှတ်ရေးထိုးရန်။
၂။ မြို့နယ်စည်ပင်သာယာရေးကော်မတီသည် -
(က) အပိုဒ်(၁)ပါအတိုင်း အထောက်အထားများပြည့်စုံမှုရှိပါက အောက်ပါအချက်များကို ကွင်းဆင်း စစ်ဆေးရန်အတွက် စစ်ဆေးမည့်ရက်/အချိန်အား အကြောင်းကြားမည်(လုပ်ငန်းလိပ်စာပြောင်း အတွက်သာ)-
(၁) ပတ်ဝန်းကျင်ကန့်ကွက်မှု ရှိ/မရှိ၊
(၂) အခြားမြေ/ဉပစာကို ကျူးကျော်ဆောင်ရွက်ခြင်း ရှိ/မရှိ၊
(၃) ပါဝင်ရမည့် အထောက်အထားပြည့်စုံမှု ရှိ/မရှိ။
( ခ) ကွင်းဆင်းစစ်ဆေးပြီးနောက် လိုအပ်ချက်မှာကြားခြင်းနှင့် အထောက်အထားများ စိစစ်ချက်တို့အရ လိုအပ်ချက်မရှိပါက စစ်ဆေးတွေ့ရှိချက်နှင့်အတူ ခရိုင်စည်ပင်သာယာ အုပ်ချုပ်ရေးမှူးရုံးသို့ တင်ပြဆောင်ရွက်မည်ဖြစ်ပါသည်။
( ဂ) ခရိုင်ရုံးက လိုင်စင်နှုန်း၏ ၂၅% အား ဝန်ဆောင်ခပေးသွင်းပြီးကြောင်း အထောက်အထားနှင့် ခွင့်ပြုလိုင်စင်ကတ်ပြားပြန်လည်ရရှိပါက “လိုင်စင်နောက်ကျောပါ စည်းကမ်းချက်များအား လိုက်နာရမည်ဖြစ်ကြောင်း” အသိပေး ရှင်းလင်းချက်ဖြင့် လုပ်ငန်းရှင်ထံသို့ အကြောင်းကြား၍ လိုင်စင်ကတ်ပြားထုတ်ပေးမည်ဖြစ်ပါသည်။
(ဃ) မြို့နယ်စည်ပင်သာယာရေးကော်မတီ၏ ဆောင်ရွက်ချက်သည် အခြားအကြောင်းမရှိလျှင် (၄)ရက်တာ ကာလအတွင်း လုပ်ငန်းပြီးစီးအောင် စိစစ်ဆောင်ရွက်မည်ဖြစ်ပါသည်။
၃။ ခရိုင်စည်ပင်သာယာအုပ်ချုပ်ရေးမှူးရုံးသည်-
(က) မြို့နယ်၏ တင်ပြချက်အပေါ် မြေပြင်ကွင်းဆင်းစစ်ဆေး၍ လိုင်စင်ခွင့်ပြုသင့်ကြောင်း စိစစ်ရရှိပါက လိုင်စင်နှုန်း၏ ၂၅% အား ဝန်ဆောင်ခပေးသွင်းရန် (ကျသင့်နှုန်းထားကို မြို့နယ်ရုံး၊ စည်ပင်ဘဏ်၊ AYA ဘဏ်၊ KBZ ဘဏ်တို့တွင်) မြို့နယ်မှတစ်ဆင့် လုပ်ငန်းရှင်ထံသို့ အကြောင်းကြားမည်ဖြစ်ပါသည်။
( ခ) ငွေသွင်းချလံရရှိပါက ခွင့်ပြုသည့် လိုင်စင်ကတ်ပြားနှင့် ခွင့်ပြုမိန့်အား မြို့နယ်သို့ ပြန်လည်ပေးပို့ ဆောင်ရွက်မည်ဖြစ်ပါသည်။
( ဂ) မိမိရုံးသို့ ရောက်ရှိသည့် အချိန်မှ (၆)ရက်တာ ကာလအတွင်း စိစစ်ဆောင်ရွက်ပြီး လိုင်စင်ခွင့်ပြုမည်ဖြစ်ပါသည်။
လိုင်စင်ခွင့်ပြုနိုင်ခြင်းမရှိသည့်အချက်များ
၄။ မြေပြင်ကွင်းဆင်းစိစစ်ချက်အရ အောက်ဖော်ပြပါအချက်များ တွေ့ရှိပါက လိုင်စင်ခွင့်ပြုနိုင်ခြင်း မရှိပါ-
(က) ပတ်ဝန်းကျင်အနှောင့်အယှက်ဖြစ်ကြောင်း ကန့်ကွက်မှုရှိနေပြီး ယင်းကန့်ကွက်ချက်ကို စိစစ်ရာ မှန်ကန်ကြောင်း တွေ့ရှိရခြင်း၊
( ခ) အထောက်အထားပြည့်စုံမှုမရှိခြင်း။
၅။ ပတ်ဝန်းကျင်အနှောင့်အယှက်ရှိကြောင်း တိုင်ကြားမှု၊ အငြင်းပွားမှုများရှိသည့် မြို့နယ်/ခရိုင် အဆင့်ဆင့်မှ လိုင်စင်ခွင့်ပြုနိုင်ခြင်းမရှိသော လုပ်ငန်းများနှင့်ပတ်သက်၍ ဌာနသို့ တင်ပြခွင့်ပြုချက် ရယူပါသည်။ လိုအပ်ပါက ဌာနက ကော်မတီဝင်များအစည်းအဝေး(EC)သို့ တင်ပြဆောင်ရွက်မည်ဖြစ်ပြီး (EC)၏ ဆုံးဖြတ်ချက်သည် အတည်ဖြစ်ပါသည်။
၆။ ဌာန/EC ဆုံးဖြတ်ချက်အရ လိုင်စင်ခွင့်ပြုနိုင်ခြင်းမရှိပါက လုပ်ငန်းရှင်ထံသို့ စာဖြင့် အကြောင်းကြား မည်ဖြစ်ပါသည်။
၇။ ဌာနမှူးက ချမှတ်သည့် အမိန့်နှင့်စပ်လျဉ်း၍ ကျေနပ်မှုမရှိပါက အကြောင်းကြားစာ လက်ခံ ရရှိသည့်နေ့မှ ရက်ပေါင်း ၃၀ အတွင်း ကော်မတီသို့ တင်ပြနိုင်သည်။
၈။ ကော်မတီက ချမှတ်ထားသော အမိန့်သည် အတည်ဖြစ်သည်။
ကုန်ကျစရိတ်
၉။ လိုင်စင်လျှောက်ထားခြင်းအတွက် ကုန်ကျစရိတ်မရှိပါ။
၁၀။ ပြောင်းလဲခြင်း(၁)ခုခြင်းစီအတွက် လက်ရှိ ဘဏ္ဍာနှစ်(၁)နှစ်အတွင်း ခွင့်ပြုလိုင်စင်နှုန်း၏ ၂၅% ကို ဝန်ဆောင်ခအဖြစ်ပေးသွင်းရန် ဖြစ်ပါသည်။
လိုအပ်သည့်ပုံစံများ
၁၁။ Online မှသာ လျှောက်ထားဆောင်ရွက်ခြင်းဖြစ်ပါသည်။ လျှောက်ထားရမည့်ပုံစံအား www.ycdc.gov.mm Website ရှိ Online ဝန်ဆောင်မှုများ ကဏ္ဍတွင် ဝင်ရောက်လျှောက်ထားနိုင်ပါသည်။
အရေးယူဆောင်ရွက်ခြင်း
၁၂။ သက်ဆိုင်ရာလုပ်ငန်းများအလိုက် သတ်မှတ်ထားသည့် လိုင်စင်စည်းကမ်းချက်များကို လိုက်နာ ဆောင်ရွက်ရမည်ဖြစ်ပါသည်။
၁၃။ လိုင်စင်စည်းကမ်းချက်အား လိုက်နာဆောင်ရွက်ခြင်းမရှိပါက ရန်ကုန်မြို့တော်စည်ပင်သာယာရေး ဉပဒေ(၂၀၁၈ ခုနှစ်) ပုဒ်မ ၂၈၁ အရ အောက်ဖော်ပြပါအတိုင်း အရေးယူဆောင်ရွက်ခြင်း ခံရမည်ဖြစ်ပါသည်-
(က) ဒဏ်ကြေးငွေ တပ်ရိုက်ခြင်း၊ (သတ်မှတ်လိုင်စင်နှုန်း၏ ၅ ဆ)
( ခ) လိုင်စင်ကို ကာလအကန့်အသတ်ဖြင့် ရုပ်သိမ်းခြင်း၊
( ဂ) လိုင်စင်ကို ပယ်ဖျက်ခြင်း။
အထွေထွေ
၁၄။ လိုအပ်သည့်အထောက်အထားများပြည့်စုံမှုရှိသော်လည်း ကော်မတီက အခါအားလျော်စွာ လိုင်စင် ခွင့်မပြုရန် အမိန့်ညွှန်ကြားချက်ဖြင့် ထုတ်ပြန်ထားသည့် လုပ်ငန်းများအား လိုင်စင်ခွင့်ပြုနိုင်ခြင်းမရှိပါ။